[首爾景點]活在現實與過去之間 一日逛盡傳統與現代景點 三清洞+北村韓屋+景福宮+仁寺洞

2015年11月24日

首爾係一個幾特別既地方,好傳統又好現代化,之前曾經寫過首爾穿越時空系列,包括著韓服同住韓屋,今次想介紹兩個好傳統既景點,但傳統同時附近又有好現代的景點,所以就可以計劃一條穿越過去與現在的路線啦!呢條路線預計大半日就可以逛完,夜晚就梗係又去掃貨啦!
 


三清洞

起點是地鐵安國站1號出口的三清洞,屬於現代化的一個小區,充滿優閒藝街氣息,因為周圍都係高檔餐廳、cafe、藝術館同時裝店。呢度既時裝店都係走型格路線,比較高檔少少,加上舖頭既裝飾都好靚,一路上都有唔少塗鴉,令整個氣氛都會好有格調。最鍾意呢度係因為人唔多,慢慢行睇下d小店,去cafe坐下,偽文青的生活是也。
 

 

 

 

 

 

 

 

 

 

 

 

 

 

 


北村韓屋

行完三清洞,就一定要去埋附近的北村韓屋,由現代返回古代的韓國。北村韓屋仍然保留朝鮮時代的房子建築,完全就係古裝韓劇裡出現的屋,非常非常古典。北村在朝鮮時代係有錢人或者官住的地方,即係以前的豪宅區,可能因為甘所以建築保存得好好。而家仍然有好多人住係呢d韓屋裡面,有d就改左做民宿,想更深入感受傳統韓國風味可以住下韓屋民宿。

遊北村韓屋其實都有路線的,因為當地有所謂「北村八景」,從唔同角度欣賞呢個傳統村落都有唔同感覺,仲可以了解下韓國歷史。我就冇行曬全部,但我都幾鍾意呢個地方,環境好寧靜,又好古色古香,櫻花期間仲有櫻花樹,韓屋加櫻花好有詩意!
 

 

 

 

 

 

 

 

 

 

 

 


景福宮

同樣由三清洞行得到去既另一個傳統景點就係景福宮啦。其實大家都應該好熟悉景福宮,幾乎係大部份人第一次去韓國都應該會入去行下。但通常入到去行唔夠10分鐘就會想走......而我,都竟然入過去3次!!第一次就因為第一次啦,第2、3次都係為左要陪第一次去韓國既朋友入去而再度同景福宮say hi。但好慚愧既係即使去左3次,都冇完全行曬成個景點,就係因為大家都行左唔夠10分鐘就話想走......
 

 


好啦我都簡單介紹下佢,咳咳,景福宮就係以前朝鮮李氏國王的宮殿。(請問有邊個會唔知?)首爾其實都仲有幾個宮殿,但景福宮係最受歡迎,因為佢規模最大同埋建築設計最靚。而且有好多韓劇都係呢度拍的,例如<<宮>>同埋<<仁顯皇后的男人>>等,可能都係令佢受歡迎的原因之一。入場費3000won,即港幣約$21。入到去會見到成個景福宮最重要的地方-勤政殿,就係以前國王上朝見大臣同做野的地方,唔可以入去,只可以係門口睇下入面既擺設,就是很古老和有霸氣的樣子。之後行行下就會見到唔同的宮殿,可能係國王寢室,可能係皇后的。除非你對歷史非常有興趣,如果唔係應該都唔會太想研究邊個宮殿係屬於邊個的。好多人黎景福宮都係因為呢度環境優美,如果櫻花同紅葉期間黎,都可以睇到美美的風景。
 

 

 

 

 


除左睇宮殿,景福宮仲有兩件事可以做,其中一件係免費試著韓服,門口可以排隊試。而另一件事就係每逢整點在景福宮的正門口光化門都有守門將交接儀式,可以睇到好多來自300年前的古裝大人行黎行去。儀式完左仲可以同佢地影相哈哈哈。佢地好高大好有型,不過完全冇表情的。當然了,古裝大人都是好認真的!!都係個了解朝鮮歷史的有趣體驗。對歷史文化有興趣的很適合去景福宮。
 

 

 


仁寺洞

最後最後,黎到仁寺洞!呢個可以話係一個集合傳統與現代的地方,因為呢度有好多好多賣韓國傳統手工藝品的店舖,用黎做手信一流,一路行都覺得條街好有古典味。但同時仁寺洞又有好現代的小型商場,包括以本地創作做招徠的Ssamziegil,仲有個新開的Maru Mall ,就賣比較高檔的潮流野,各有特色。呢度仲有好多cafe同茶室,行到累去飲杯野就岩曬。對藝術有興趣的可以行畫廊,呢度有好多好多間。仁寺洞仲有一個遊客中心,我之前曾經介紹過可以黎呢度試穿韓服,可以睇返[首爾景點] 穿越時空第一擊 化身15分鐘尚宮娘娘 仁寺洞韓服體驗。總括黎講仁寺洞係一個好有韓國本地特色的地方,值得一來!

呢4個地方都係一個接一個步行距離去到,調返轉條路線都可以,中間會經過的地鐵站包括安國站同景福宮,是但一個站落都可以。
 

 

 

 

 

 

 

 

來源:少女旅行日記