[宜蘭景點] 宜蘭一日遊(下) 進入幾米廣場公園的繪本世界 羅東夜市嚐宜蘭特產

2015年6月11日

除左國立傳統藝術中心外,另一個想推介既宜蘭景點就係幾米廣場公園。我諗好多人都有睇過幾米既繪本,我細個都好鍾意睇,鍾意佢七彩繽紛的畫風同埋簡潔溫柔的文字。宜蘭火車站外就係一個幾米的世界,好多繪本裡面既場景都變成實景出現,好似走左入繪本裡面!
 

http://4.bp.blogspot.com/-rerff68BVXY/VWgL3GjiOUI/AAAAAAAAEII/UE3NZY9wKbM/s640/DSC03344.JPG


我去個時係夜晚,但我絕對建議大家都係日頭黎,因為呢個景點係影相為主,夜晚的確失色不少,好難影到靚相。大家睇落去就會明白。

宜蘭火車站的入口係一個森林風的設計,那長頸鹿是<走向春天的下午>裡的角色。大家準備好走入童話世界了嗎?
 

 


火車站對面有個鐵樹森林,樹頂吊住架星空列車,係繪本<星空>裡面架列車!!好靚呀!!雖然頭先話建議大家日頭黎,但矛盾既係呢個場景要夜晚睇先夠靚,因為夜晚列車周圍既吊燈先會開,好夢幻!!呢個都係成個幾米廣場公園我最鍾意既場景,列車裡有個興奮的小朋友伸個頭出黎,有一種列車會載住夢想向前進發的興奮感覺。
 

 

 

 


之後一路向前行會有個獨立場景,就係<星空>裡的兩個小朋友一齊在車站等車的情景,好可愛。
 


過返對面就係一個大型少少既公園,將<向左走向右走>、<地下鐵>等繪本場景一次過呈現大家眼前,好多影相位。另外又有幾米繪本故事介紹同耳熟能詳的經典金句。公園好繽紛,好童話,不願長大的少男少女們應該都會好鍾意呢度。(係咪都係覺得日頭黎會好d呢?)
 

 

 

 

 

 


呢度原本係廢棄左既鐵路局宿舍,最後重新設計改建成幾米公園。點解人地台灣既重建同香港既重建爭甘遠架呢?人地係將d真係荒廢左既建築物重新設計成有意思有吸引力既地方,香港呢就係夾硬拆人地原本好地地既野唔知整d咩垃圾出黎......

雖然總括黎講幾米廣場公園唔係好大,不過慢慢睇下影下相,都可以消磨到一個鐘既。最重要係七彩繪本世界的氣氛好歡欣啊。

去完幾米廣場公園之後,仲去左宜蘭一個比較出名既夜市-羅東夜市。呢個夜市既格局同台灣大部份夜市都一樣甘濟,食野為主,周圍有d小店小攤檔賣d唔太吸引既東西......同埋好多人。而羅東夜市最特別係佢賣既野食同一般台北夜市賣既唔同,因為呢度係宜蘭麻,宜蘭最出名既係三星蔥,所以整個夜市都充斥三星蔥食物,有三星蔥肉串、三星蔥烤餅、三星蔥大阪燒......但問題係少女唔鍾意食蔥......所以對住一埋綠色的蔥蔥蔥真係冇咩胃口。至於其他野食都......總之整體感覺同台北唔同,唔會有大腸包小腸、鹽酥雞個d,想試特別既就好岩黎羅東夜市!我最後亂買左一堆野返民宿食,都OK既。
 

 

 

 


如果大家想一日去曬國立傳統藝術中心、幾米廣場公園同羅東夜市,最好的路線係幾米廣場公園>國立傳統藝術中心>羅東夜市。因為後面兩個地方都屬於羅東鎮,所以應該放埋一齊去。宜蘭的介紹就到這裡,下次再去的話應該會以溫泉同住靚民宿為重點!

幾米廣場公園
地址:宜蘭縣宜蘭市光復路1號(宜蘭火車站)
開放時間:24小時
入場費:免費

羅東夜市
地址:宜蘭縣羅東鎮民生路、民權路、公園路、興東路(羅東火車站)
開放時間:18:00-00:00

 

來源:少女旅行日記