踢凳、向後挨、霸位王...你又遇過幾多個？機上10類惡頂乘客！

 

去旅行，搭飛機嘅時候，人人都希望自己前後左右既乘客安安分分，唔好有麻煩野攪到自己，全程都舒舒服服。但當你愈係咁諗，你就更易遇到一啲你好唔想遇到，但佢又偏偏坐係你前後隔離既「麻煩友」。

Expedia向501位18歲以上香港旅客進行問卷調查，得出10大惡頂乘客行為，而最惡頂嘅乘客果然不負眾望就係...

 

Expedia十大難頂乘客排行榜

第十位：扶手霸王 9.2%

無論你係用坐飛機定入戲院睇戲，只用一邊扶手，留番另一邊扶手俾隔離嘅人用係一種公德心。但萬一你搭飛嘅時候，咁啱得你一個人飛、咁啱又坐兩個人中間、又咁啱你隔離兩個係自私精霸哂兩個扶手，咁你成程機都逼到GG了！

 

第九位：超級巨無霸 11.5%

一個足夠坐兩個位嘅乘客，咁啱坐咗係你隔離，而「咁好彩」你另一邊個位又坐左個同樣級數超級巨無霸，即係話三個人需要五個坐位空間，但此時此刻只可以逼係三個位嘅空間，佢地逼之餘，你自己都肯定被逼到透唔到氣咁濟。

 

第八位：拉凳精 11.6% 

有冇試過坐緊中長途或夜機嘅時候，諗住可以好好瞓番覺，一瞓醒就到達目的？當你就嚟進入夢鄉，準備去探周公嘅一刻，俾後面乘客「回天一拉」，成個人都被嚇醒。跟住...跟住你就再冇見過周公！

 

第七位：闊佬懶理家長　22.5%

小朋友唔識性，哭叫不停，大家都會明白。但係小朋友嘅父母理都唔理下，由佢係機上嘈吵，點講都講通。

 

第六位：無腰骨　23.7%

經濟艙空間有限，前後坐位可以話係寸金尺土，遇上一啲一上機就向後挨嘅乘客，坐係佢地後面嘅乘客，無論用膳、睇戲都變得非常不便。

 

第五位：雷公　23.9%

打鼻鼾打到行雷咁，坐中長途機總會遇上，除非整醒佢地，否則都係帶備耳塞以策萬全。

 

第四位：開籠雀　24.7%

如果一個人搭飛機嘅時候，鐘意靜靜地做自己野，萬一遇上熱情健談乘客，想禮貌咁碗拒同佢傾計，建議可以扮瞓覺。

 

第三位：異味怪客　35.0%

嘈，你可以戴耳塞。逼，你可以就一就。臭，你應該無哂計！假如你隔離乘客因衞生問題或噴上刺鼻香水，而發出陣陣「仙氣」，真係無處可逃。加上香港空氣質素低，唔少港人都有鼻敏感，難怪異味怪客打入三甲之內。

 

第二位：大聲公（婆）　40.4%

有冇試過坐一轉機，你對某個素未某面嘅人家庭背景相當了解，佢有幾多個仔女、仔女幾多歲、婚姻狀況等等你都瞭如指掌。點解？鬼叫佢地講野咁大聲，塞咗兩個耳塞都仍然聽到：「三太公個老婆個表妹乜乜乜...」。雷公、超級巨無霸、異味怪客等，呢啲都係佢地控制唔到，其他或多或少都會體諒

 

第一位：踢凳魔　43.0%

面對後面嘅踢凳魔，除咗佢係有病，否則無論你點揾都揾唔到忍佢嘅籍口。踢凳係一種好挑釁嘅行為。

（受訪者：香港旅客／ 圖：咳神）

---