新年快樂之各國過年習俗大不同

(文:Winnie)

 

首先要祝大家雞年大吉大利，心想事成，去多幾次旅行!

一到農曆新年，唔少傳統習俗又會俾大家提起，例如母親大人不斷叫你執屋，又例如銀行又見到人排隊換新銀紙封利事。香港嘅新年習俗就大家都知，咁其他地方嘅農曆新年習俗你又知唔知先?

 

台灣

台灣嘅農曆新年同香港其實十分相近，其中一個最大唔同可以話係「添歲錢」。同長輩給晚輩嘅壓歲錢有所不同，添歲錢係由晚輩給長輩的，預意壽比南山，而且每年的金額都會提高，希望長輩可以身體健康，延年益壽。

另外台灣的元宵慶祝活動比香港多，會有不同的燈會、祭儀，例如平溪天燈節就較為香港熟識。

 

韓國

有睇開韓劇同韓國綜藝嘅朋友應該都知，韓國人一樣好重視農曆新年，電視都會播放唔少新春特輯。

韓國人的新年慶祝活動保留左唔少傳統習俗，例如年初一早上，會係屋企擺設年禮、歲酒、年糕片湯等進行祭祀，然後全家人會聚埋一齊食飯，同我地年三十晚嘅團年飯一樣。

另外，韓國都有拜年嘅習俗，去親朋好友屋企聚會、玩遊戲以及進行民俗活動，如擲骰子、抽陀螺等。不過比起派利事，韓國人送禮多數送十分實用嘅家居用品。

 

新加坡

新加坡內的華人人口比例較高，所以新年氣氛一樣濃厚。在牛車水的春節市場，會在大年初一燃放煙花炮竹、舞龍舞獅，非常熱鬧。濱海灣亦會有迎春節的大型慶祝活動。

要講到新加坡與香港春節的不同，就是新加坡人會在新年食“撈起”， 即是魚生、蔬菜及生果絲、白芝麻、花生碎，調料及醬汁等裝成一盤，食前要邊將食材混合，邊叫“撈起，撈起”，喻意新一年可以風生水起行好運。其實香港都有得食撈起，不過當然唔夠年糕同蘿蔔糕咁受歡迎啦~

 

越南

越南同樣有過農曆新年嘅習俗，除左貼揮春行花市外，越南人仲有個風俗叫“採綠”，就係新年時將一根樹枝帶番屋企，因為“綠”和“祿”同音，“採綠”即係“採祿”，意味將吉祥帶回家。

越南人鍾意嘅年花除左桃花外，仲有劍蘭、大麗菊同金橘等，同樣有吉利嘅喻意。