台北自由行,少女旅行日記,OIA伊亞藝術咖啡館,淡水

[台北景點] 走過淡水海岸 與可愛草泥馬一齊嘆下午茶

TravelLiker 22 May 2015 9102 編:vivien

5.0

[台北景點] 走過淡水海岸 與可愛草泥馬一齊嘆下午茶

 

唔知幾時開始草泥馬呢種動物變得好受歡迎,世界各地都有唔少以草泥馬做賣點的景點,除左農場、動物園之外,連cafe都可以搵到草泥馬的蹤影!!今次就去左台北淡水的OIA伊亞藝術咖啡館,同草泥馬一齊嘆下午茶,睇下佢地有幾打耳先~

http://2.bp.blogspot.com/-TS7To67pECw/VUnQ2l390PI/AAAAAAAADz0/EkjNXzUeJBg/s1600/DSC03469.JPG


淡水應該好多人都去過,不過大部份人都去老街、漁人碼頭個邊的傳統景點,今次去遠少少,捷運淡水站落車再轉巴士,去到三芝北勢溪口站落車,就會見到OIA伊亞藝術咖啡館,門口有條banner話俾你知佢就係草泥馬世界啦!
 

 


一入到cafe,一隻白雪雪、毛茸茸的傻仔草泥馬就立即出現!佢個樣真係好傻好天真。Cafe都幾大,分左室內同室外兩個區域,兩邊都有用餐位置。我去個日落大雨,所以全部人都坐室內。而室內就有一隻駐場草泥馬,就係一入門口見到個隻啦。唔好睇佢個樣得得意意,其實草泥馬都幾大隻,感覺類似係巨型版綿羊。呢隻草泥馬非常活潑,一直係cafe裡面走黎走去,仲會好主動走埋去每張枱同客人吹水,唔係,係食你枱面d野。總之佢經常出現在你附近,想親近佢其實唔難,但,草泥馬都係現實的傢伙,你必須要有野俾佢食,先留得住佢個身。(佢個心唔需要啦下話)
 

 

 

 

 


草泥馬食咩大?當然唔係你點個d窩夫啦。Cafe提供紅蘿蔔條任客人拎黎餵草泥馬,所以在場幾乎所有人都拎定幾條紅蘿蔔條係手,當傻仔草泥馬行埋你附近,你就可以用紅蘿蔔條引誘下佢,呢個都係同佢影合照的最好時機!!!但唔好睇呢隻草泥馬個樣傻下傻下,佢反應都幾快,通常3秒食完你條紅蘿蔔條佢就會即閃,講聲拜拜你條尾就去下一枱繼續覓食,毫不留情,所以要成功合照真係要餵多幾次先可能影到一張係靚架!現場所見少女們應該好唔滿意d相,不停餵完又餵、影完又影,不停圍住草泥馬轉,隨時候命,一見佢行埋黎就飛身撲埋去。可能傻仔草泥馬心諗:其實你地班人先係真正既傻仔......
 

 

 


頭先講過cafe有室外區,其實室外區先係真正的草泥馬區域,因為呢度好似一個小型農場,有成7、8隻唔同顏色的草泥馬!!原來仲有啡色同黑色架~佢地俾個圍欄圍住,都可以餵飼同影相,不過佢地比較喜歡聯群結黨,幾隻痴埋一齊又唔係好郁甘,目光呆滯,所以唔太好玩......同佢地say左個hi就唔想理佢地了。哈哈。
 

 

 

 

 

 


室外區都有餐枱,仲係全海景,但個日落大雨咩都睇唔到,天氣好的話可以想像景色會好靚。不過室外區太多草泥馬的關係,會有少少味,介意的話坐室內會比較好,但室內又有隻傻仔草泥馬行黎行去同埋港女們瘋狂尖叫同大笑......
 


最後,終於講下食物啦!(nobody cares!)Cafe有最低消費,每人台幣$150,大概係一杯飲品的價錢,都合理。我試左個焦糖蘋果窩夫,味道唔錯,但個窩夫唔算係好鬆軟個種,質感有待改進。價錢台幣$200,即港幣$50,少少貴。又飲左熱阿里山紅茶,幾香幾好飲,唔記得價錢,都係台幣$150左右。Cafe仲有意粉食,不過其實大家黎到都係掛住同草泥馬玩,食物已經唔重要啦!
 

 


草泥馬其實真係幾打耳架,個樣好傻豬豬,但上次大阪玩完,今次台北再玩,興奮感覺已經減退左喇,所以我都未必會再黎,留返俾其他少女們啦~送上草泥馬pat pat一個,祝大家都影到打耳既合照!
 


OIA伊亞藝術咖啡館
地址:台灣新北市三芝區後厝里北勢子12-1號
交通:捷運淡水站再轉公車到三芝北勢溪口站
營業時間:11:00 - 21:00

 

文章來源:少女旅行日記

* 圖片來自網絡,如有侵權,請聯繫我們刪除/加注明

相關內容更多>

編輯精選更多>

2018福岡県北九州夢幻紫藤花園(日本限定)

河內藤園是日本福崗屈指可數的紫藤花園,為了保護藤木,藤園的主人進行嚴格管理,因此並不是特別熱衷於宣傳,吸引旅客。它有很高的聲譽,可以說是在全國最美麗的紫藤花園,快來感受步行於花紫藤隧道和圓頂紫藤之下。

TravelLiker

22 Feb 201818451
2018濟州自由行交通、景點、住宿、美食全攻略 (自駕遊、包車、當地團、巴士遊)(最新版)

韓國濟州島天然資源豐富,既可以欣賞不同的自然風光,又可以品嚐當地著名的黑豬肉及海產,可說是一個頗適合短途自由行的地方。不過因為濟州的交通沒有大城市那麼方便,亦沒有地鐵,令不少想去濟州自由行的朋友卻步。其實只要配合自己所需,選擇最合適的交通方法,自由行遊濟州並沒有想象中困難。以下介紹4種濟州自由行可以考慮的交通方法: 自駕遊、包的士、跟當地團及坐巴士,出發前了解好濟州交通,一切都難不到您!

TravelLiker

08 May 201894195